اعتذار&تهنئه&كلمتين كده عن الدراسه

السلام عليكم ورحمه الله وبركاته
طبعا بعتذر فى الاول عن انقطاعى الفتره اللى فاتت لانى كنت مسافر وطبعا جيت على اول الدراسه يعنى كانوا يومين ملخبطين شويه
انا بس عاوز اهنئكم بحلول شهر رمضان الكريم اعاده الله علينا بالخير واليمن والبركات
وانا عارف انها جت متاخره بس معلش اعذرونى
وليه تهنئه خاصه للجماعه اللى بيحبوا الدراسه بمناسبه بدايه العام الدراسى الجديد اللى شكله كده حيبقى زى العسل
وطبعا كلنا بنحب الدراسه وايام الدراسه
بس كل واحد ليه سبب فى حبه للدراسه
يعنى فى اللى بيحبها علشان المذاكره ودول حسب ما اظن قليلين اوى وتقريبا بينقرضوا
وفى اللى بيحبها علشان الانشطه اللى ممكن تمارسها فى ايام الدراسه سواء فى المدرسه او الكليه
يعنى امثله بسيطه للانشطه اللى ممكن تمارسها فى المدرسه على ايامى انا يعنى محنا خلاص عجزنا وبقينا فى كليات عموما الانشطه هي
اولا: اهم الانشطه النوم بجد احلى نوم النوم فى الفصل وده طبعا نتيجه ارتفاع مستوى التعليم فى المدارسه بدرجه فوق الممله
ثانيا: التفنن فى اختراع الوسائل اللذيذه اللى تخليك تاكل والمدرس ميشوفاكش
ثالثا: ده بقه نشاط خاص فى بالولاد وده نشاط عالى المستوى وهوا اختراع انظمه شدبده الدقه للتزويغ وما الى ذالك من النط من فو السور او الكانتين
او الطريقه الغريبه اللى كنت والله بشوفها بش هيا طريقه بدائيه اوى وليا تحفظ عليها
كان الطلبه يقفوا جنب الباب واول ما يتفتح يحصل هجوم شنيع عباره عن طوفان من الطلبه ويزقوا كل اللى يقف قدامهم من مدرسين وما الى ذالك
يعنى نشاط غريب وانا بالامانه ماحولتش اجى جنبه لانه للمحترفين بس
اخر نشاط هوا المذاكره فى الفصل وده نشاط محترم جدا للناس الهادفه والطموحه لغد افضل
وطبعا مش حقولكم على الانشطه فى الكليه بتبقى عامله ازاى .اظن ان الاغلب فى كليات وعارف
او اتخرج وبرضه عارف
بس مش عارف انا حاسس ان السنه دى فى الكليه كئيبه ليه؟ دا عندى انا فى الكليه يمكن حاله خاصه
عموما بعد التهيس ده كله
بجد اتمنى اننا كلنا نحقق اللى بنطمح ليه فى المجال اللى احنا فيه وبتمنى ان شاء الله ان ربنا يكرمنا فى الشهر الكريم ده ويقدرنا على عمل الخير
فى النهايه احب بس اودع صديقى العزيز كده سبونسر اللى ساب التدوين الفتره اللى جايه بجد يا محمد حنخسرك كتييير
طلب صغير بس
يا اهلاويه ادعوا اننا نغلب الزمالك بكره لان بجد مش حينفعنا الا الدعاوى واللى ملهومش فى الكوره ووجع الدماغ ده يدعى برضه للاهلى يعنى من باب التجديد

مصر هيا امى

كنت قاعد مره على الصخور قدام البحر وطبعا دى قاعدة ملهاش حل جه على بالى موضوع جامد اوى هوا ليه الشباب كلهم عاوزين يهجوا ويروحوا احدى دول الخليج او دول اوربيه يبتدوا حياتهم هناك؟
بجد سالت نفسى سؤال هوا لوكله ساب البلد ومشى ايه اللى حيحصل؟
يعنى انا مش بعترض على ان الانسان يسافر ويكافح بره بلده على اساس انا نوع من الكفاح المطلوب وكنوع من الانانيه وحب النفس الموجوده فى معظم البشر يعنى انا فى المقام الاول
بس لو فعلا كل الدكاتره والمهندسين والمحاسبين الخ الخ الخ سابوا البلد واشتغلوا بره مين حيشتغل فى مصر؟؟؟؟مين اللى حيتقدم بمصر اذا كان اولادها خلعوا منها؟؟؟؟؟؟؟؟؟؟؟؟
تيجى تقول الكلام ده لحدمن الشباب حتلاقى اجابه من اتنين
اولا" انا عاوز الاقى شغلانه اكسب منها بسرعه علشان الحق اجهز نفسى بسرعه بسرعه واتجوز بقى"!!!!!يعنى ممكن معاه حق ومقدرش اقوله حاجه
ثانيا يجيلك واحد بقى يغيظك ويقولك "انا مالى مكلوا بيسافر اشمعنا انا؟؟؟؟"ههههههه اشمعنى !!!!كلمه مستفزه اوى
الظاهر انا الناس اللى بتسافر دى بتبقى حطا فى بطنها بطيخه صيفى وفاكره ان مصر بايادى امينه وطبعا انتوا عارفين الايادى دى موديا مصر فين
بجد ياجماعه دة مينفعش
ليه متديش لمصر زى مديتلك ؟ ليه لا؟ليه متفكرش فى مصر وحالها ومكانتها اللى بقت لا تسر عدو ولا حبيب؟؟؟
وعلى فكره كل جيل بيقلد اللى قبله
يعنى لما كله بيسافر حتلاقى ولادك عاوزين يسافروا وولاد ولادك عاوزين هما كمان تحت مبدا اشمعنىىىىىىىىى او مبدا انا مالى
يا جماعه لو استمر الحال بالشكل ده تخيلو مصر بعد كام سنه حتبقى عامله ايه؟؟؟
ليه منفكرش كده ونشوف الفراعنه عملوا حضاره وايه حضاره العالم كله يكن لها الاحترام والتقدير لحد دلوقتى
وطبعا الفراعنه عملو الحضاره دى بجهدهم هما وادوا مصر زى مديتهم وكانت النتيجه اقو حضاره فى ذلك العصر
ليه منبقاش مثلا زى اليابان؟؟؟؟؟؟
طبعا اول محد يسمع الجمله دى يقولك مستحيل
طب ليه مستحيل؟؟؟؟؟؟
هما يعنى الجماعه دول بنوا دولتهم ازاى؟؟؟ لوحدهم, بجهد اهلها ومش بمساعده حد
وعلى فكره شعبنا ذكى جدا وده نتيجه البروتين الجامد اوى اللى فى الفول ههههه
بجد يا جماعه مينفعش
لازم ندى مصر علشان نتقدم لازم ولاد مصر يدوها زقه هيا زقه جامده انا عارف بس متهيألى احنا قدها وقدود
بجد يا جماعه حيكون احساسنا ايه ودوله تعداد سكانها قد تعداد سكان حى باكوس متقدمه على بلد السبعين مليون نسمه؟؟؟؟؟؟؟؟؟؟
لازم نحس بواجبنا ناحيه مصر ومنبقاش سلبيين وده دورنا احنا الشباب ومنعتمدش على الكبار لانهم لا بيساعدوا ولا نيله
بجد ولاد مصر هما اللى يقدروا يخلوا مصر احسن واحسن وروحوا اسالوا اليابان والصين والدول ديه هما كبروا ازاى
بجد حال مصر ميفرحش خالص وبصوا على المدى البعيد لو بقينا زى محنا حنبقى عاملين ازاى ومحدش يقولى دور الحكومه لانها للاسف مش بتشوف اللى احنا بنشوفه

تاج تاج تاج

فكره التاج دى فكره جميله على الرغم ان فيها اساله غريبه شويه بس فكره ظريفه وجميله وطبعا انا لسه مباقليش يومين ورماهولى صديقى العزيز سبونسر
بصوا هوا فيه كام سؤال كده يعنى مش حعرف اجاوبهم عموما حتشوفوا
س 1 : أحب شخص لقلبك ف الدنيا؟
اكيد احب شخص لقلبىوالدى ووالدتى بس مش حعرف افضل حد عن حد
س 2 : انسان مستعد تضحى بحياتك _ ركز ف كلمة حياتك_ عشانه؟
معتقدتش ان فى حد فى زمنا ده يستاهل يمكن لو كنا زمان شويه كان يبقى الرسول(صلى الله عليه وسلم)هوا اللى اضحى بحياتى علشانه
س 3 : اسم أول حب؟
والله مفاكر اسمها بس متهيالى ايمان
س 4 : اسم اخر حب حتى الآن؟
والله ربنا يسهل ويكون اخر حب فى حياتى بس متهيالى الاسم مش مهم
س 5 : ما هو اسم أجمل كتاب بشر قرأته و محتفظ بيه حتى الآن؟
هوا كتاب شيق اوى بيتكلم عن مثلث برمودا اسمه (مثلث برمودا بين الواقع و الخيال)
س 6 : شئ تحس بالراحة النفسية عندما تنظر إليه؟
السرير ههههههههههههه
س 7 : مكان تحس فيه بالحنين إلى شئ لا تدرى ما هو و ذكريات جارفة إلى لا شئ؟
شقتنا القديمه لان دا المكان اللى عشت اجمل ايام حياتى فيها
س 8 : مكان تحس بالراحة عندما تدخله؟
الاوضه بتاعتى
أجمل مدينة زرتها داخل مصر؟
والله انا ملفتش مصر بس متهيالى احلى مدينه فى المدن اللى زرتها هيا الاسكندريه
أجمل مكان طبيعى رأيته داخل مصر؟
حديقه الحيوانات هههههههههههههه
سرعة بروسيسور جهازك؟
3,2GHz
حجم ذاكرة هارد جهازك؟
160gega+40gega
المساحة التى تشغلها المواد الاسلامية على جهازك؟
والله الجهاز لسه متفرمت قريب كان فيه باد سيكتور بعيد عنكوا فكل حاجه اتمسحت بس المواد الاسلاميه عموما عندى على اسطوانات
نفس المساحة السالف ذكرها فى قلبك _الإجابة لنفسك عشان الرياء ياخوالنا؟
والله الواحد بيجتهد وبيحاول بس عموما المساحه اللى انت بتتكلم عليها دى فى القلب صعب ان الانسان يقيسها لنفسه وصعب حد تانى يقيسهاله بس طبعا علمها عند الله بس المهم ان ربنا يكون راضى عنك لان ده المهم
نوع هاتفك المحمول؟
nokia 6230i
أهم هدف انت واضعه لحياتك دلوقتى؟
والله هيا اهداف كتير بس اهمها انى اتفوق فى دراستى فى كليه الصيدله وابقى وسط الاوائل مع انه هدف صعب اوىىىىىىىىىىىى لان احنا معانا جبابره فى الكليه (ماشاء الله طبعا) بس ادينا حنحاول وربنا يستر
مواصفات فتاة الأحلام؟
والله هيا ليها موصافات كتير بس اهمها يعنى علشان موجعش دماغكوم انها تكون عاقله كده وبتفكر كويس ومتكونش نكديه دى اهم صفه متكونش نكديه لان كتير من البنات بيتحولوا بعد الجواز ويبتدى النكد بس طبعا دا ميمنعش ان فيه بنات مش نكديه وبيحبوا الهزار(الجمله الاخيره دى علشان لو بنت قرت البوست ولا حاجه هههههههه
صف ما يأتى: شعورك لما بتسمع كلمة مصر؟
اكيد طبعا بحس بالفخر لكونى مصرى يعنى مصر حتفضل مصر بلد الحضاره والتاريخ ومهما عدى عليها من فترات تدهور ذى اللى احنا فيها دى مصر حتفضل مصر وطبعا بفتكر جمله حلوة اوى (لو لم اكن مصريا لوددت ان اكون مصريا) دى طبعا للزعيم الراحل مصطفى كامل
وكفايه كمان ان مصر فيها النادى الاهلى ههههههههههههه
شعورك لما بتسمع كلام عن اليهود؟
مفيش كلام يوصف كرهى لليهود قد ايه وطبعا اخص بذلك الجماعه الاسرائليين وطبعا يعنى ازاى مكرهومش وانا شايفهم 24 ساعه بيقتلوا فى المسلمين بس ليهم يوم ان شاء الله
شعورك لما بتشوف ضابط شرطة؟
مش حجاوب لانى ليا اعتراض على سياسه الامن فى مصر بس مش معنى كده انى مبحبش مصر علشان مفيش حد يفسر كلامى غلط
شعورك لما بتشوف الكناس العجوز ف الطريق؟

اولا الشغل مش عيب بس اكيد دمى حيتحرق لان الانسان لما بيكبر بيبقى محتاج للراحه بس ايه دا لو ارتاح حياكل منين؟ يعنى اكيد حتضايق
لون البطانية اللى بتتغطى بيها ف الشتاء؟
احمر طبعا لون فانله الاهلى
لون الجورب_الشراب_ المفضل لديك؟
ابيض طبعا ( مع الاعتذار للزمالكويه انا طبعا مقصدش حاجه)هههههه
أفكارك تجاه شاب ماشى ف الطريق يلبس جلابية بيضاء قصيرة و عمامة و له لحية و بيبه السواك و بيده المصحف؟
انا عن نفسى مش بحكم على حد الا لما اعرفه كويس وطبعا ان بعد الظن اثم
فا انا مش ححكم عليه لا بخير ولا بشر وربنا يهدينا جميعا
على فكره الاهلى حينزل قريب جلابيات حمرا عليها رقم22 دا للى عاوز يشترى ههههههههههههههه
احساس يراودك فى اشارة مرور مغلقة بسبب مسئول كبير؟
والله دول اولياء الامور سيبوهم فى حالهم يا جدعان يعملو اللى هما عاوزينه حد عنده اعتراض مش كفايه الهموم اللى عندهم
فعلا انا بفتكر مسرحيه الزعيم بتاعت عادل امام فاكرينها دى باختصار اجابتى حتلاقوها فى مسرحيه الزعيم وححاول اجيبلكم اللينك بتاعت الحته اللى اقصدها قريب
اوووووووووووووووووووووووووووووووووو
خلصت
طبعا انا لسه جديد فمعرفش بقى حرمي التاج على مين بس قريب حرميه على حد ربنا يسهل

طلع اللى معاك

طبعا يا جماعه انتوا عارفين ان مصر بلد الامن والامان ,مصر بلد العالم كله بيحسدنا عليها وعلى الامان اللى فيها,,,,,,,,,,,,ههههههههه
بس طبعا دى الجمله اللى بيقولها دايما قادة البلد اصحاب السلطات العاليه اوى اللى بيشوفوا حاجات احنا مبنشوفهاش
بس تخيلو احنا كمان بنشوف حاجات هما ما بيشوفوهاش........اه والله
المهم احد مظاهر الامان فى مصر ان شعبها بيثبت بعضه بالمطاوى والامواس وما الى ذالك بقى من ادوات التثبيت المشهوره
كان زمان اوى الناس كانوا يقولولنا متمشوش فى شوارع ضلمه لحسن حد يطلعلك ويثبتك ...يعنى زمان التثبيت كان بيبقى فى الشوارع الضلمه او الشوارع الفاضيه او الحتت المهجوره
بس ده كان زمان!!!!!!!!!! ازاى؟؟؟؟؟؟
دلوقتى التثبيت بقى عينى عينك بالنهار وعلى ارصف الشوارع الرئيسيه تخيلو البجاحه طبعا لانى اللى بيثبتوا دول بيحسوا بالامان فى مصر
ححكلكوا مثال
واحد صاحبى واقف على شارع ابو قير فى الاسكندريه (وده اكبر شارع عمومى فى الاسكندريه) وفجاه
وقف قدامه ميكروباص ونزل منه 4 بادوات التشريح سورى ادوات التثبيت وبكل سهوله اخدوا كل اللى معاه من موبيل ومن محفظه وفلوس بس الحمد لله سابوله هدومه دا كان فى عز الظهر وعلى شارع ابوقير
ما علينا
حاجه تانيه واحد اعرفه شاب فى ثانويه عامه كان رايح درس ووقف تونايه(يعنى ميكروباص صغير 6راكب ده للى ميعرف التونايه) المهم
ركب الواد وكان فى التونايه 2 غير السواق ولما العربيه مشت شويه كده راحوا مطلعين العده ومثبتين الواد جوا العربيه تخيلوا وطبعا اخدوا كل حاجه بس حصل حاجه تثبتلنا ان التثبيت خبره ودقه
الجدع اللى ثبت الواد طلعله الخط من الموبيل وادهوله و قاله خده مش حستفاد بيه!!!!!!!!!!!!!!!ههههههه
مش عارف ده من باب الشفقه ولا من باب الذل ولا علشان هوا عارف انه فعلا مش حيستفاد من الخط
عموما حبيت اوريكوا بس الامان فى مصر وصل لفين
يعنى الواحد بعد كده يمشى فين لا شارع ضلمه نافع ولا شارع عمومى نافع
طيب الواحد يركب ايه
اعتقد ان الحل ان الواحد علشان يحمى نفسه يمشى بسيف ودرع (زى ايام الكفار كده) علشان اللى يجى يثبته يخاف منه
يعنى انا مش بخوفكم بس دى مصر بلدنا بلد الامن والامان
على فكره حنسمع قريب ان فيه اعلان فى الجورنال يعلن عن افتتاح اكادميه التثبيت ودى بتاخد اللى جايبين 50% فى الثانويه فما تحت
ربنا يستر

انت اهلاوى ولا زملكاوى؟؟؟؟؟

انت اهلاوى ولا زملكاوى ؟؟؟؟ سؤال مهم جدا جدا وبيتسال كتييير اوى انا عن نفسى شايف انه سؤال مهم انك تعرف انتماء الشخصيه اللى بتتعامل معاها زى مبتعرف سنه جنسيته الخ الخ الخ
فيه ناس بقه بتعتبر الانتماء لنادى وتشجيعه بتعصب تفاهه وعبط وحاجات كده تسالهم ليه يقولولك حتستفاد ايه لما تشجع النادى ده او ده حتاخد مثلا من الملايين اللى بيخدوها اللعيبه وبعدين تعالى هنا بدل متتعصب للاهلى او الزمالك يا اخى شوف حال بلدك شوف فلسطين اعمل حاجه بلاش تفاهه
قمه الاستفزاز
اولا الانتماء لنادى وتشجيعه بتعصب (بس مش بتعصب اعمى علشان محدش يفهمنى غلط) مفيهوش اى حاجه لان انتمائك لنادى وتشجيعه باخلاص دى حاجه جميله جدا لانك حتتعود تخلص لاى حاجه انت فيها وتتعصب ليها (برضه مش سبب مقنع ليهم)طيب
حقولكم حاجه بسيطه لو منتخب مصر لعب ضد منتخب اسرائيل حتشجعوا مصر ولا مش حتشوفوا الماتش اصلا حتكون الاجابه الطبيعيه حنشجع مصر طبعا ..........ليه ؟ علشان انا مصرىومصر بتلاعب عدونا.بس دى رياضه مش انت قولت كده؟ لا بس لازم نكسب سرائيل علشان نثبت اننا..................كلام كتير بقى انا اقصد انك بتشجع مصر اهوه لانك مصرى انتمائك مصرى فيها ايه بقى لما اشجع الاهلى لانى اهلاوى؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟زى ما انت شجعت مصر لانك مصرى وطبعا تشجيعك لمصر وفرجتك على الماتش مش تفاهه صح؟؟؟ يبقى لما اكون اهلاوى واشجع الاهلى ابقى مش تافه صح ولا ايه؟؟؟؟؟؟؟
واكيد اختيارك لاى نادى تشجعه حيكون ليك اسبابك لاختياره ودى حريتك ومن حق النادى اللى انت بتنتمى ليه انك تخلصله وتشجعه وتقف جنبه حتى لو بيخسر زى ما انت بتفتخر انك مصرى رغم ان مصر زى مكلكوا عارفين تحتل مراكز مرموقه بين البلاد صناعتنا بسم الله ما شاء الله تغزو اسواق العالم كله والامثله كتييير(سوق الجمعه مثلا) ورغم مكانه مصر دى انت برضه مصر وبتحب مصر و ابن مصر متهيالى مفيهاش حاجه بقى انى ابقى اهلاوى واحب الاهلى واخلصله واشجعه مش تفاهه يعنى
عموما انا بفتخر بكونى مصرى وبفتخر بكونى اهلاوى ودايما حقف جنب النادى واشجعه حتى لو خسر (وده ان شاء الله مش حيحصل) زى ما انا مصرى ومستعد اعمل اى حاجه لمصر
من الاخر بقى انا اهلاوى وبحب الاهلى وححبه واشجعه للابد واللى عنده اعتراض على الكلام ده او لسه مقتنع انه كده تفاهه يا ريت يقولى بس يجيبلى سبب مقنع